 |
Главная » 2012 » Февраль » 5 » Արթուր Աբրահամ. Պետք է ամուր նյարդեր ունենաս, որ մրցակցիդ «կոտրես», ոչ թե դու «կոտրվես»
   
04:54 Արթուր Աբրահամ. Պետք է ամուր նյարդեր ունենաս, որ մրցակցիդ «կոտրես», ոչ թե դու «կոտրվես» |
Արթուր
Աբրահամ. Պետք է ամուր նյարդեր ունենաս, որ մրցակցիդ «կոտրես», ոչ թե դու
«կոտրվես»
.
Պրոֆեսիոնալ
ռինգում Արթուր Աբրահամն արդեն մեծ հաջողությունների հասել է` դառնալով IBF
վարկածով միջին քաշային կարգի աշխարհի չեմպիոն եւ 10 անգամ պաշտպանելով
չեմպիոնական տիտղոսը: Սակայն հայ բռնցքամարտիկը, տեղափոխվելով երկրորդ միջին
քաշային կարգ, մի փոքր նահանջ ունեցավ նվաճումների մեջ: Super Six մրցաշարում
Ժերմեյն Թեյլորին հաղթելուց հետո Աբրահամին չհաջողվեց զարգացնել հաջողությունը: Իսկ
2011 թվականին Անդրե Ուորդին պարտվելուց հետո նրան սկսեցին քննադատել: Այդ
պարտությունից ուղիղ յոթ ամիս անց Աբրահամը ռինգ դուրս եկավ արգենտինացի Պաբլո
Օսկար ֆարիասի դեմ ու հաղթեց մրցակցին տեխնիկական նոկաուտով հինգերորոդ
ռաունդում:
NEWS.am-ի թղթակիցը զրուցել է Արթուր Աբրահամի
հետ:
Արթուր, քո վերջին
մենամարտում որոշակի փոփոխություն նկատվեց մարտավարության մեջ: Ինչո՞վ է
պայմանավորված այդ փոփոխությունը:
Ինչպես գիտեք, ես
երկար ժամանակ հանդես էի գալիս միջին քաշային կարգում եւ հիմնականում մենամարտում
էի` շեշտը դնելով ամուր պաշտպանության վրա: Տեղափոխվելով երկրորդ միջին քաշային
կարգ` ես զգացի մարտի տարբերությունը: Այստեղ, ճիշտ է, բռնցքամարտիկի անձնական քաշը
շատ չի տարբերվում միջին քաշայինից, բայց հարվածի ծանրությունն ու ազդեցությունը
էականորեն են տարբերվում: Վերջին մենամարտում ես ավելի շատ էի շարժվում ռինգում ու
դրա հետ մեկտեղ հարվածների քանակն էի ավելացրել ու երբեմն էլ գործում էի
հարվածաշարերով: Մարտավարությունը անպայման պետք է փոխվի, որպեսզի կարողանաս
հաջողության հասնել: Այստեղ, ի տարբերություն միջին քաշային կարգի, բռնցքամարտիկի
դիմադրողականությունն էլ է բարձր, այնպես որ մարտավարության փոփոխությունը ուղղակի
պահանջելի է:
Հնարավո՞ր է , որ
նորից սկսես հանդես գալ միջին քաշային կարգում:
Չեմ կարծում, որ
այդպես կլինի: Յուրաքանչյուր բռնցքամարտիկ զգում է, թե որ քաշային կարգում է իրեն
լավ զգում: Միջին քաշային կարգում հանդես գալու համար ես պետք է մոտ տասը կիլոգրամ
քաշ գցեմ, իսկ նման պարագայում արդեն մենամարտելը դժվարանում է, եւ չես կարողանում
ռինգում ցուցադրել այն մարտը, որին ունակ ես: Ինձ համար հիմա երկրորդ միջին քաշային
կարգը ամենահարմարն է:
Այս տարվա սկզբին
դու հայտարարել էիր, որ ձգտելու ես չեմպիոնական գոտի նվաճել: Դա լինելու է Ռոբերտ
Շտիգլիցի՞ հետ մենամարտը:
Այն, որ ես ձգտելու
եմ չեմպիոնական գոտի նվաճել, դա փաստ է: Բայց թե ում հետ տեղի կունենա այդ
մենամարտը, հիմա դժվար է ասել: Այս տարվա մարտի 31-ին ես եւս մեկ մանամարտ եմ
անցկացնելու, եւ հաղթանակի դեպքում արդեն բանակցությունների կսկսենք վարել Շտիգլիցի
հետ մենամարտ անցկացնելու համար: Մենամարտեր կազմակերպելու ու անցկացնելու համար
համաձայունթյան պետք է գան պրոմոութերները:
Միացյալ
Նահանգներում դու երկու պարտություն կրեցիր: Նպատակ չունե՞ս վերադառնալ ԱՄՆ
հաղթելու համար:
Ինձ համար հիմա
ամենակարեւորն ու առաջնայինը աշխարհի չեմպիոն դառնալն է: Դրանից հետո արդեն նոր
կմտածենք այլ մարտերի մասին:
Ըստ քեզ`
ժամանակակից բռնցքամարտում ու մասնավորապես երկրորդ միջին քաշային կարգում
հաջողության հասնելու համար ի՞նչ է պահանջվում մարզիկից:
Բոլոր քաշային
կարգերում էլ հաջողության հասնելու համար շատ գործոններ են կարեւոր: Բռնցքամարտիկը
պետք է միշտ հավատա իր ուժերին ու աշխատասեր լինի, պետք է լավ մարզիչ ու պրոմոութեր
ունենա: Լավ թիմ պետք է ունենա, վերջապես: Բռնցքամարտիկը պետք է նպատակ ունենա ու
աշխատի այդ նպատակին հասնել: Սակայն բռնցքմարտիկի թիկունքը (թիմը) պետք է ամուր
լինի: Այս ամեն ինչի հանրագումարում նոր կարելի է մեծ հաջողություններ
ակնկալել:
Եղե՞լ են
մենամարտեր, որոնց ընթացքում զգացել ես, որ պարտվում ես եւ նյարդայնացել ես ու
նետվել դեպի մրցակիցը:
Իհարկե, եղել են:
Իհարկե, նյարդայնացել եմ, բայց չեմ նետվել դեպի մրցակիցը: Այստեղ արդեն
հոգեբանության ու հավասարակշռության գործոններն են առաջ գալիս: Ինչքան էլ
նյարդայնանաս, չպետք է առանց մտածելու քայլեր կատարես մարտի ընթացքում: Հակառակ
դեպքում կպատժվես: Պետք է ամուր նյարդեր ունենաս, որ մրցակցիդ «կոտրես», այլ ոչ թե
դու «կոտրվես»:
Արթուր, ժամանակին
Մուհամեդ Ալիին ռինգում ոտքերի աշխատանքի շնորհիվ պարող բռնցքամարտիկ էին անվանում:
Չես գտնո՞ւմ, որ հիմա էլ ոտքերի աշխատանքը ռինգում հաջողության գրավականներից մեկն
է:
Միանշանակ համաձայն
եմ, որ ոտքերի աշխատանքը շատ կարեւոր գործոն է հաղթանակի հասնելու համար: Բայց ոչ
բոլորն են կարողանում նման ձեւով մենամարտել, քանի որ յուրքանչյուր բռնցքամարտիկ
ունի իր ոճը, իր ձեռագիրը: Հետո բնությունն էլ իր դերն ունի այստեղ: Ոմանք հենց
այդպես էլ ծնվում են, ոմանք հասնում են դրան: Սակայն կան նաեւ բռնցքամարտիկներ,
որոնց գլխավոր զենքը ոտքերի աշխատանքը չէ: Ոճերի ու ձեռագրերի տարբերությունը ավելի
հետաքրիր է դարձնում մենամարտերը:
Բոլորին էլ հայտնի
է, որ դու մեծ հարգանք ու սեր ես վայելում Գերմանիայում: Իսկ գերմանացի Ռոբերտ
Շտիգլիցի հետ մենամարտում քեզ դժվար չի՞ լինի:
Եթե այդ մենամարտը
կայանա եւ կայանա Գերմանիայում, չեմ կարծում, որ որեւէ մեկիս հեշտ կլինի: Կարեւորը
հաղթանակն է: Երբ հաղթում ես, միշտ էլ լավ է լինում: Ինչ-որ առանձնակի դժվարություն
չկա: Պետք է դուրս գաս ռինգ ու ձգտես հասնել քո նպատակին: Հիմա կարեւոր է հաղթանակի
հասնել մարտի 31-ին կայանալիք մենամարտում, հետո նոր մտածել հաջորդի մասին: Դեռեւս
պարզ չէ, թե ում հետ եմ մենամարտելու այդ օրը, բայց այդ ուղղությամբ աշխատում է իմ
պրոմութերը:
Արթուր իսկ
մարզումներից բացի ժամանակ ունենո՞ւմ ես այլ նորություններով հետաքրքրվելու
համար:
Իհարկե: Ես ժամանակ
գտնում են օրվա բոլոր նորություններին ծանոթանալու համար: Ի դեպ, նշեմ, որ երբ
միացնում եմ համակարգիչը եւ միացնում եմ ինտերնետին` անմիջապես բացվում է NEWS.am
կայքի էջը: Ես ձեր կայքի միջոցով ծանոթանում եմ ոչ միայն Հայաստանի, այլ նաեւ
տարածաշրջանային շատ լուրերի:
Շնորհակալություն:
Զրուցեց Խաչիկ
Չախոյանը
Լուսանկարում.
Ալեքսանդր Աբրահամ, Էվանդեր Հոլիֆիլդ, Արթուր Աբրահամ, Նիկոլայ Վալուեւ, պրոմոութեր
Վիլֆրիդ Զաուերլանդ
Լուսանկարի
աղբյուր. Arthur-abraham.de
|
|
Категория: Спорт-Sport | Просмотров: 588 | Добавил: Smbat | Рейтинг: 5.0/1 | |
 |
News
